Museum Sursilvan
Cuort Ligia Grischa
Cordial beinvegni
Il Museum Sursilvan Cuort Ligia Grischa a Trun ei in dils pli bials edifecis historics en Surselva. El ei vegnius erigius da 1674-1679 dalla claustra da Mustér ed ha surviu sco casa cumin dalla Ligia Grischa. La sala dil causligia, era numnada sala d’uoppens, fuorma il cor dalla casa.
Oz gioga igl art en la Cuort Ligia Grischa ina impurtonta rolla ed ei la raschun che bia amaturas ed amaturs digl art visetan il museum. Exposiziuns permanentas d’ovras originalas ein dedicadas als enconuschents artists daTrun: Alois Carigiet, Matias Spescha, Gieri Schmed e sora Gelia Degonda (da Cumpadials).
Andrea Alig &
Fis Guldimann
Exposiziun d’art dils 12 da fenadur tochen ils 31 d’october 2025
Andrea Alig
Las pusseivladads da s’exprimer a moda creativa cun textilias, en special cun teilas da glin creadas a maun fascineschan ella dapi sia scolaziun. Ultra dalla lavur vid textilias ha ella era creau objects da lenn e da plastic.
Fis Guldimann
Fier ed itschal drova el pil solit sco artist. El centrum da sias figuras e sculpturas sta il carstgaun e sia via da viver in tut las fassettas. Adina puspei s’occupa el cun tgaus.
Alois Carigiet
L’exposiziun «Skizzas dad Alois Carigiet» porscha la pusseivladad da s’approfundar en sia maniera da luvrar e da patertgar. En sias skizzas seconfrunta igl artist a moda spontana ed intima cun singuls detagls en situaziuns specificas. Las skizzas fuorman la basa la pli fundamentala da sias ovras e lubeschan ina egliada nunfiltrada el process da creaziun ed el mund da Carigiet.
Guid d’art e historia
La Cuort Ligia Grischa a Trun
La Societad da historia d’art Svizra SHAS ha lantschau la seria “Guids d’art e historia Svizra” el 1935. 2024 ei il niev guid d’art e historia vegnius edius en collaboraziun culla fundaziun Museum Cuort Ligia Grischa pubblicada en tuts treis lungatgs dil cantun Grischun. Ils auturs ein Sandro Decurtins e Marc Antoni Nay.
Disponibels tier nus en stizun per 20 CHF.
