Da scuvierer
Casa Carigiet
Aunc duront la reconstrucziun sesarva la CASA CARIGIET per l’emprema gada al publicum: L’ENTSCHATTA / DER ANFANG presenta ovras dad Alois Carigiet ord il relasch dalla famiglia, ovras ch’illustreschan il motiv da plazzals. Cumplettada vegn l’exposiziun entras l’installaziun KLIMAX dall’artista da Basilea Nadine Cueni ella stalla ed el curtin, in’inscenaziun digl uaul selvadi «Scatlè» sur Trun, in plazzal perpeten da regiuvinaziun.
Adressa
Casa Carigiet, Plaz Cadruvi 36, 7166 Trun
Temps d’avertura
Ils 2 d’uost – 28 da settember, venderdis tochen gliendisdis, 14:00-17:00
Ticket cumbinau Museum ed exposiziun Casa Carigiet CHF 17.-/ 8.-
Spazi d’art Matias Spescha
A caschun dil 100avel natalezi da Matias Spescha (1925-2008) organisescha l’Uniun Trun Cultura treis grondas exposiziuns en honur digl enconuschent artist indigen. El decuors digl onn 2025 presentan els lur entupadas individualas cun l’ovra multifara da Matias Spescha.
Gaspare O. Melcher, 15-03 – 25-05-2025
Corsin Fontana, 14-06 – 24-08-2025
Not Vital, 06-09 – 16-11-2025
En lur exposiziuns presentan ils artists lavurs actualas ch’els cumbineschan cun ovras tenor schelta da Matias Spescha, e quei dalla pictura sur las sculpturas entochen ils dessegns e las graficas.
Ticket cumbinau Museum ed exposiziun Spescha CHF 17.-/ 8.-
OGNA – la sculptura transibla
Igl enconuschent artist Matias Spescha relai cun OGNA in’ovra unica ed attractiva cun gronda radiaziun. Las preits egl intern dalla sculptura ein ornai cun maletgs digl artist che cuvieran grondas parts dalla surfatscha, gest sco quei ch’el haveva previu en siu model. En paucs loghens da quei spazi ein plasticas digl artist plazzadas.
Tenor siu giavisch eis ella accessibla alla publicitad da tut il temps e duront igl entir onn ora. Infos sin www.trun-cultura.ch
Senda d’art spel Rein
La Senda d’art a Trun ei vegnida aviarta igl onn 2007 ed ei ina amplificaziun dalla collecziun d’art el museum. Sin ina lunghezia da 1.5 km expona in tschuppel exposituras ed expositurs dalla regiun mo era da pliras parts dalla Svizra figuras, sculpturas e plasticas.
mira!cultura
Ils vitgs dalla Surselva e dil marcau da Glion han ina historia interessanta che tonscha tochen lunsch anavos el temps medieval. Aunc oz anflan ins denter ils baghetgs e l’infrastructura moderna fastitgs da quei temps. Bia da quei ei misterius e leventa las marveglias d’entelgir dapli sur da la patria ed il liug da vacanzas. In versau team da guids culturals arvan a hosps ed indigens ina finiastra el vargau ed illustreschan il mintgadi actual. Infos sin www.miracultura.ch
