Fis Guldimann
Fis Guldimann, igl artist grischun, ei naschius 1947 a Trun. El ha fatg igl emprendissadi sco montader da scaldaments.
Sco meinafatschenta da scaldaments ei el staus influenzaus da materials sco fier ed itschal. Sias activitads professiunalas han menau el tier igl art. Suenter la tresta mort da sia consorta ha el midau siu cordoli en maletgs e sculpturas. All’entschatta da siu temps creativ ha el fatg las ovras mo per sesez, ils davos onns ha el era luvrau per in vast publicum. Il tema central da sias figuras e sculpturas ei «il carstgaun e siu cuors da veta» en tut sias fassettas.
All’entschatta da sia creaziun artistica simbolisavan las figuras in carstgaun trest, il bia persuls, il bia cun tgau sbassau. Tec a tec ein las figuras vegnidas puspei pli activas, ein stadas sin peis, han tratg crappa, han anflau tier forza ed anavos en la veta. Cun il renescher e l’ascenziun ord sia tristezia ha Fis Guldimann empruau novas tecnicas e novs materials. Sias ovras artisticas ein vegnidas pli vastas, creativas, viventas. Sustegnius da ses quater affons ha la veta puspei purtau nova forza ad el.
Dapli informaziuns digl artist sut il suandont link.
Cu la proxima generaziun ei vegnida vitier en sia famiglia, ha el puspei surmuntau in cunfin. Duront quei temps creativ steva e stat sia famiglia aunc adina el center. Biaras sculpturas statten ensemen en gruppas, en famiglias, tonschan ils mauns, stattan en retscha in super l’auter, seglian, giubileschan e selegran dalla veta. Figuras dad animals campesters en fuorma da cauras, vaccas, nuorsas, lieurs, utschals muossan ina gronda colligiaziun cullas alps Grischunas, sia patria e siu dacasa a Zignau.
