Hotel Adula Flem

Restaurant La Clav Hotel Adula Via Sorts Sut 3 7018 Flem

Ils dus plantschius su creai dad Alois Carigiet, che sesanflan oz en las ustrias La Clav e Cavigilli a Flem, ein vegni mess en vendita d’ina persuna da Turitg 1986 cun in pign inserat en la Neue Zürcher Zeitung. Ei sedi ch’ils plantschius su, creai 1942 da Carigiet, erien previ oriundamein per la Kronenhalle a Turitg ni per in bastiment dil Lag da Turitg. Dapi ils onns 1950 valevan els sco spari. La finala han ils hoteliers da Flem Franzisca e Peter Hotz cumprau ils dus plantschius su per la summa da 100 000 francs. Per La Clav han els saviu duvrar quel ch’era ornaus cun glinas e steilas, ch’ei secumprovaus excellent sco reclama per l’ustria gest aviarta, essend che las gasettas – denter auter la Bündner Zeitung, NZZ, Zürichseezeitung e Die Ostschweiz – han rapportau che «l’ovra dil renomau artist» seigi puspei vegnida alla glisch. Il secund plantschiu su, ornaus cun feglia da vit ed iuas, ei staus deponius sur onns en in nuegl a Flem. La finala ha il possessur dalla ustria Cavigilli cumprau e schau restaurar el per plascher dils hosps dil local da magliar.