Placi a Spescha

Pader Placi, fegl da purs da Trun, ei ius igl onn 1774 en claustra a Mustér ed ha retschiert suenter siu studi alla claustra da Nossadunaun igl onn 1782 l’ordinaziun sacerdotala. El ei buca mo staus pader, el ei staus piunier digl alpinissem retic, geograf, cartograf e perscrutader dalla natira. Geologia, botanica, zoologia – tut fatschentava el. Plinavon eis el staus historicher, linguist e folclorist – in tipic scienziau universal da lezs temps che fageva sco affon dall’epoca digl Illuminissem atgnas perscrutaziuns. Sco alpinist ein pliras premascensiuns reussidas ad el, mo tier il Tödi ha el disdiu, tier la sisavla emprova haveva el gia 72 onns. Dapi sia giuventetgna ha Spescha studegiau il lungatg romontsch e sviluppau l’idea d’ina «naziun retoromana» cun in lungatg da scartira unificau. El ei era staus organisatur dall’emprema fiasta da centenari dalla Ligia Grischa igl onn 1824. Pader Placi ei denton buca mo staus scienziau, mobein ei era s’engaschaus per la scolaziun, per ovras socialas sco igl asil da paupers a Trun ed ha promoviu minieras ella regiun sco era il turissem da cura (Bogn Tenigia).
Pader Placi era tschell’uisa buc in sempel carstgaun. Adina puspei ha el giu da far cun ses superiurs, il convent e las autoritads communalas. Perquei sesenteva el era adina meglier sco caplon en ina pleiv che en la stretga claustra. Aviartamein ha el confessau ch’el seigi mo ius en claustra per saver sededicar a ses studis scientifics. Sesuttamess agl Illuminissem, simpatisava el cun la partida franzosa ed ha igl onn 1799 empruau d’intermediar denter ils Franzos che s’avanzavan al territori dallas Treis Ligias e la claustra che teneva cun la vart austriaca, denton senza success. Aschia ein era sia biblioteca extendida e biars da ses manuscrets e da sias cartas i a piarder.