La caplutta

La patruna dalla caplutta sesa sin in sochel avon la curnisch dalla finiastra. La glisch sclarescha ella da di dalla vart en ed ella para aschia d’intermediar denter quest e l’auter mund. En ina zaunga presenta ella in dent. Perquei ch’igl ei vegniu pitgau ora ad ella duront ina tortura tut ils dents, rugavan ins, vevan ins mal ils dents, tier s. Balugna. Probablamein vegneva era rugau tier ella avon che schar trer ora in dent.
Las picturas dil plantschiu su ein vegnidas creadas entuorn 1700 da Gion Giachen Rieg da Sumvitg. La caplutta consista da dus arviuls, sin quel davon ein ils patruns dalla claustra da Mustér, s. Placi e s. Sigisbert, ensemen cun s. Benedetg e s. Culastia da veser, sin quel davos suondan illustraziuns dils avats s. Bernhard da Clairvaux e s. Gagl sco era las misticas Gertrud von Helfta e Mechthild von Hackeborn. Il retabel digl altar ei vegnius producius 1683 da Giachen Solèr. Cunquei ch’il maletg digl altar ei vegnius remplazzaus entras ina finiastra, stat la glisch dil tschiel el center. Sper la finiastra sesanflan denton figuras pli veglias dil temps d’entuorn 1500, s. Ursicin, fundader dalla claustra egl 8avel tschentaner, e s. Adalgott, che ha introduziu suenter 1012 las refuormas da Cluny a Mustér. Talas statuas dalla gotica tardiva ein frequentas en capluttas pintgas en Surselva.
Igl altar cuntegn reliquiars, tablas canonicas e stgalins da messa, tgei che equipescha el cumplettamein.