Gelia Degonda, naschida 1937 a Cumpadials ella vischinonza da Trun, ha creau en la claustra dad Ingenbohl el decuors dils davos decennis ina ovra artistica remarcabla. Malgrad che sias lavurs el context cun architectura profana e sacrala ein stadas accessiblas al publicum, e malgrad che sias picturas e ses dessegns ein stai da veser en exposiziuns singulas e da gruppa en la Svizra centrala ed el Grischun, muncava tochen ussa ina survesta cumplessiva da siu operar multifar. Cun la monografia, ch’ei cumparida 2018, exista ussa finalmein ina retrospectiva fundada, schibein cun ina schelta representativa da sias ovras dapi ils onns 1970, sco cun ina consideraziun, caracterisaziun ed analisa approfundada el rom dalla historia d’art.

El Museum Sursilvan ha sora Gelia Degonda presentau sias ovras el rom d’exposiziuns transitoricas. Ina schelta ei oz en possess dil museum e sa vegnir contemplada en la sala da sentupada el plaunterren dil museum.

Ina pintga schelta dad ovras da sora Gielia Degonda: